काठमाडौं । लुम्बिनी प्रदेशले सुदूरपश्चिम प्रदेशलाई ११७ रनको विजयी लक्ष्य प्रस्तुत गरेको छ । प्रधानमन्त्री कप पुरुष राष्ट्रिय प्रतियोगितामा एक्स्ट्राटेक ओभलमा टस जितेर ब्याटिङ गरेको लुम्बिनी प्रदेश ४४.१ ओभरमा ११६ रन बनाउँदै अलआउट भएको हो ।

लुम्बिनीका लागि कप्तान देव खनालले सर्वाधिक ४१ रन बनाए । शिर्ष क्रममा तीन ब्याटर सस्तैमा समेटिदा देवले सम्हालिएको पारी खेलेका हुन् । उनले ७१ बलमा ४ चौका प्रहार गरे । प्रज्वल थापाले ३० रन बनाउँदा अन्य कुनै पनि ब्याटरले दोहोरो अंकको रन जोड्न सकेनन् ।

सुदूरपश्चिम प्रदेशका लागि हेमन्त धामीले सर्वाधिक ४ विकेट लिए । उनले ९ ओभरमा १ मेडनसहित २६ रन खर्चिए । सूर्य श्रेष्ठ,शेर मल्ल र मिलन बोहोराले समान २–२ विकेट लिए ।

सुदूरपश्चिम र लुम्बिनी दुवैको यो छैटौं खेल हो । लुम्बिनी ५ खेलमा ४ जित र १ हारसहित ८ अंक बटुलेको छ भने सुदूरपश्चिमले ५ खेलमा जम्मा १ जित हात पारेको छ ।