काठमाडौं । आईसीसी यू–१९ महिला विश्वकपमा नेपाली युवा टिम जितविहीन बन्दै समूह चरणबाट बाहिरिएको छ ।

बुधबार भएको समूह चरणको अन्तिम खेलमा टेस्ट टोली अस्ट्रेलियाविरुद्ध ८३ रनले पराजित भएसँगै नेपालको सुपर सिक्स सम्भावना समाप्त भएको हो ।

खेलमा अस्ट्रेलियाले प्रस्तुत गरेको १४० रनको लक्ष्य पछ्याउने क्रममा नेपालले निर्धारित २० ओभर ब्याटिङ गरे पनि आठ विकेट गुमाएर ५६ रनमात्र बनाउन सक्यो ।

नेपालबाट कप्तान पुजा महत्तोले सर्वाधिक १८ रन बनाइन् । यसबाहेक, नेपालका अन्य ब्याटर दोहोरो अंकसम्म पुग्न सकेनन् । अलिसा यादवले नौ रन थप्दा साना प्रविनाले आठ र सावित्री धामीले सात रन बनाइन् । नेपालको तीन ब्याटरले रनको खाता खोल्न सकेनन् ।

नेपाललाई सस्तैमा समेट्न अस्ट्रेलियाका लिली बासिङथवेट, जुलियट मोर्टोन र हसरत गिलले समान दुई विकेट लिए । क्लोइ एन्सवर्थको नाममा एक विकेट रह्यो । त्यसअघि, अस्ट्रेलियाका काओम्हे ब्राईले सर्वाधिक ४५ रन बनाइन् । एलेनोर लारोसाले ३१ रन थप्दा हसरत गिलले ३० रन जोडिन् ।

नेपालकी कप्तान पुजा महत्तोले तीन विकेट लिइन् । यस्तै, सिमाना केसीले दुई विकेट लिँदा रिया शर्माले एक विकेट हात पारिन् । यो नजितासँगै युवा विश्वकपमा नेपालको यात्रा टुंगिएको हो । नेपाल यसअघि विश्वकपको पहिलो खेलमा बंगलादेशविरुद्ध पाँच विकेटले र दोस्रो खेलमा स्कटल्यान्डविरुद्ध एक विकेटले पराजित भएको थियो ।