काठमाडौं । जय ट्रफी एलिट कप प्रतियोगितामा नेपाल पुलिस क्लबले मधेश प्रदेशमाथि सहज जित हात पारेको छ । वीरगञ्जमा भएको रेड बल क्रिकेटमा टस जितेर पुलिसले मधेशलाई पहिला ब्याटिङमा बोलाएको थियो । पहिला ब्याटिङ गरेको मधेश पहिलो पारीमा १२९ रनमा अलआउट भएको थियो ।

पुलिसले आफ्नो पहिलो पारीमा ४ विकेटमा २५८ रन बनाएर पारी घोषित गरेको थियो । त्यसपछि मधेश दोस्रो पारीमा ९४ रनमा अलआउट भयो । मधेश यसरी एक पारी र ३५ रनले पराजित भएको हो ।

पुलिसको जितमा ब्याटिङतर्फ कुशल भुर्तेलले ६३ रन बनाएका थिए भने उनले नै बलिङमा पनि उत्कृष्ट प्रदर्शन गरे । उनले पहिलो पारीमा २ विकेट लिएका थिए भने दोस्रो पारीमा ५ विकेट लिए । भुर्तेललको अलराउन्ड प्रदर्शनमा जारी प्रतियोगितामा पहिलो नतिजा निस्केको हो । पुलिसका लागि पहिलो पारीमा गुल्सन झाले ५ विकेट लिएका थिए भने दोस्रो पारीमा ३ विकेट लिए ।

उता मधेशका लागि मयन यादवबाहेक अन्यको प्रदर्शन निकै फितलो रह्यो । मयनले पहिलो पारीमा ५९ रन बनाएका थिए भने दोस्रो पारीमा पनि २२ रन बनाए । तर, उनलाई कुनै पनि ब्याटरबाट सहयोग नहुँदा मधेश जारी प्रतियोगितामा पहिलो हार व्यहोर्न बाध्य भएको हो । मधेशका लागि कप्तान हरिशंकर साहले दुई र रुपेश सिंहले एक विकेट लिएका थिए ।

यसअघि पहिलो खेलमा मधेशले बागमती प्रदेशसँग ड्र खेलेको थियो भने पुलिस क्लबले त्रिभुवन आर्मीसँग बराबरी खेलेको थियो ।