काठमाडौं । सिद्धार्थ बैंक नेपाल प्रिमियर लिग (एनपिएल) मा लुम्बिनी लायन्सले कप्तान रोहितकुमार पौडेलको अलराउन्डर प्रदर्शनमा पहिलो जित दर्ता गराएको छ।
यसअघि लगातार चार खेलमा पराजित भएको लुम्बिनीले आफ्नो पाँचौ खेलमा पहिलो जित दर्ता गराएको हो।लुम्बिनीले मंगलबार चितवन राइनोजलाई ३३ रनले पराजित गरेको हो। जारी प्रतियोगिता चितनवले भने पाँच खेलमा दोस्रो हार ब्यहोरेको छ। लुम्बिनीले दिएको १६८ रन पछ्याएको चितवनले २० ओभरमा ८ विकेटको क्षतिमा १३४ रन मात्र बनाउन सक्यो।
चितवनलाई रोक्ने क्रममा लुम्बिनीका कप्तान पौडेलले ४ विकेट लिए। उनले चितवनका विपिन रावललाई ५ रन, सोहिल तन्विरलाई १ रन, रवी बोपारालाई १२ रन र जान लोफ्टी इटनलाई ६ रनमा आउट गरे। लोफ्टी इटनलाई १४औं ओभरमा एलबिडब्लूको धरापमा पार्नुअघि रोहितले अरु ब्याटरलाई क्याच गराए।

चितनवका लागि ३१ रन जोडेका लुक बेन्केस्टाइनलाई अभिसेष गौतमले आउट गरे। २९ बलमा ३ चौका र १ छक्का प्रहार गरेका उनलाई गौतमले उन्मुक्त चन्दबाट क्याच गराए।
चितनवका कप्तान कुशल मल्ल पनि २० रनमा आउट भएपछि लुम्बिनी पहिलो जित नजिक पुगेको थियो। कुशललाई साद बिन जफरले अभिसेषबाट १७औं ओभरमा क्याच गराए।

त्यसअघि रेमन्ड सिमन्सले ओपनर सन्तोष कार्की र अमरसिंह रटेउलालाई क्रमश: १० र ८ रनमा आउट गरे। रिजन ढकाल १५ रन र नरबहादुर सार्की २२ रनमा नटआउट रहे।
बलिङमा रोहितले चार विकेट लिँदा १७ रन मात्र दिए। रेमन्ड सिमन्सले २ विकेट लिए। साद बिन जफर र अभिसेष गौतमले १-१ विकेट लिन सफल भए।

त्यसअघि कीर्तिपुरस्थित त्रिवि मैदानमा टस जितेको चितवनले फिल्डिङ रोजेपछि पहिले ब्याटिङ गरेको लुम्बिनीले ६ विकेटको क्षतिमा १६७ रन जोड्यो।
लुम्बिनीका लागि कप्तान रोहितकुमार पौडैल र साद बिन जफरले अर्धशतक प्रहार गरे। अन्तिम ओभरको तेस्रो बलमा चितवनका रिजन ढकालको बलमा क्याच हुनुअघि रोहितले ८० रन जोडे। रोहितले ५७ बलमा ६ चौका र ५ छक्का प्रहार गरे।

उनले साद बिन जफरसँग पाँचौं विकेटका लागि ११४ रनको साझेदारी गरे। जफरले पनि अर्धशतक प्रहार गरे। उनले ३५ बलमा ५२ रन जोडे। त्यसका लागि जफरले ४ चौका र १ छक्का प्रहार गरे। अनी अन्तिम बलमा रनआउट भए। खेलमा रोहितले चार पटक जीवनदान पाएका थिए। उनको क्याच लिन चितवनका बलर पटक-पटक चुकेका थिए। जारी एनपिएलमा रोहित सर्वाधिक रन प्रहार गर्ने ब्याटरको शीर्ष स्थानमा छन्। उनले पाँच खेलमा दुई अर्धशतकसहित २६१ रन जोडेका छन्।

लुम्बिनीले राम्रो सुरुवात भने गर्न सकेन। ओपनर आशुतोष घिरैयालाई दोस्रो ओभरमा चितवनका दायाँ हाते तीव्र गतिका बलर रिजन ढकालले एक रनमै बोल्ड गरे। दुई बलपछि उन्मुक्त चन्दलाई रिजनले विपिन रावलबाट क्याच गराए।

ओपनिङ ब्याटर अर्जनु साउदले १५ रन बनाए। १२ बलमा १ चौका र १ छक्का प्रहार गरेका साउदलाई रन्जित कुमारले कप्तान कुशल मल्लबाट सातौं ओभरमा क्याच गराए। अर्को ओभरमा टम मुर्स १० रन जोडेर आउट भए।

बलिङमा चितवनका रिजन ढकालले ३ विकेट लिए। उनले ४ ओभरमा २९ रन दिए।