काठमाडौँ । भारतीय पूर्व ओपनर क्रिकेटर शिखर धवनले कर्णाली याक्सबाट नेपाल प्रिमियर लिग (एनपीएल) खेल्ने भएका छन् ।

कर्णाली याक्सले ३८ वर्षीय भारतीय पूर्व खेलाडी धवनलाई भित्र्याएको हो । धवन एनपीएल खेल्ने अहिलेसम्मका हाइप्रोफाइल क्रिकेटर हुन् । धवनले गत अगस्तमा भारतको अन्तर्राष्ट्रिय र घरेलु क्रिकेटबाट संन्यास लिएको घोषणा गरेका थिए ।

भारतका लागि ३४ टेस्ट, १६७ एकदिवसीय र ६८ टी–२० खेलेका धवनले आईपीएल टिम पञ्जाव किंग्सको कप्तानी पनि गरेका थिए । उनले आईपीएलमा पञ्जाब किंग्ससहित डेकन चार्जर्स, मुम्बई इण्डियन्स, दिल्ली क्यापिटल्स र सनराइजर्स हैदरावादबाट खेलेका थिए । उनले भारतका लागि अन्तिम खेल सन् २०२२ को डिसेम्बरमा खेलेका थिए ।

सोमपाल कामी मार्की खेलाडी रहेको कर्णालीले यसअघि पाकिस्तानका अल राउण्डर हुसैन टलात, हङकङका बाबर हायात र वेस्ट इन्डिजका चाडविक वाल्टनलाई भित्र्याएको छ । नेपाल क्रिकेट संघ (क्यान) ले आयोजना गर्ने पहिलो नेपाल प्रिमियर लिग आगामी मङ्सिर १५ देखि पुस ६ सम्म त्रिभुवन विश्वविद्यालयको अन्तर्राष्ट्रिय क्रिकेट मैदानमा आयोजना हुँदैछ ।