काठमाडौं ।  टी-२० क्रिकेट इतिहासमा पहिलो पटक ३ सुपर ओभर खेल भएको छ। भारतको एक राज्यस्तरीय प्रतियोगितामा यस्तो भएको हो। कर्नाटकको महाराजा ट्रफी टी-२० क्रिकेट प्रतियोगिताको नतिजाका लागि ३-३ सुपर ओभर भएका हुन्। अन्तिम सुपर ओभरमा पनि अन्तिम बलको चौकाले निर्णय दिएको थियो।

बैंगलोरस्थित एम चिन्नास्वामी मैदानमा शुक्रबार भएको हुबली टाइगर्स र बैंगलोर ब्लास्टर्सबीच भएको खेल रोमाञ्चक बन्यो। त्यसो त यसअघि २-२ पटक सुपर ओभर भएर खेलको निर्णय धेरै पटक आएको छ। तेस्रो पटक सुपर ओभरमा धकेलिएको भने यो पहिलो घटना हो।

खेलमा हुबली टाइगर्सले १ सय ६४ रन बनाएको थियो। जवाफमा बैंगलोरले पनि अन्तिम ५ बलमा २ रन बनाउन नसक्दा खेल १ सय ६४ रनको बराबरीमा पुग्यो। त्यसपछि भएको पहिलो सुपर ओभरमा दुबै टिमले समान १०-१० रन बनाए। त्यसपछि दोस्रो सुपर ओभरमा खेल धकेलियो जहाँ दुबै टिमले समान ८-८ रन बनाए।

त्यसपछि तेस्रो सुपर ओभरमा पुगेको खेल निर्णायक बन्यो। जहाँ बैंगलरले १२ रन बनायो। जवाफमा हुबलीले अन्तिम बलमा चौका प्रहार गर्दै १३ रन बनाएर खेल रोमाञ्चक रूपमा आफ्नो पक्षमा पारेको थियो।