तनहुँ, २९ असार । एक सय ४० मेगावाट क्षमताको तनहुँ जलविद्युत् आयोजनाअन्तर्गत प्रसारण लाइनको काम प्रभावित भएको छ । प्याकेज–३ अन्तर्गत प्रसारण लाइन निर्माणको काम वन क्षेत्रका कारण प्रभावित भएको हो । वन क्षेत्रको जग्गा प्रयोग रूख बिरुवा हटाउन स्वीकृति नपाउँदा प्रसारण लाइन निर्माण कार्य प्रभावित भएको आयोजनाका निमित्त प्रमुख श्यामजी भण्डारीले जानकारी दिनुभयो ।

तनहुँतर्फको भागमा समस्या नरहे पनि चितवनतर्फ समस्या रहेकाले समस्या समाधान गर्नेतर्फ आयोजना लागिरहेको भण्डारीले बताउनुभयो । प्रसारण लाइन निर्माणको काम अहिलेसम्म ७३ दशमलव ५ प्रतिशत सकिएको छ । प्रसारण लाइनमा पर्ने ९४ वटा टावरमध्ये अहिलेसम्म ७७ टावरको जग हाल्ने र ६९ वटा टावर जडान कार्य सम्पन्न भइसकेको छ ।

केइसी इन्टरनेसनल, भारतले दमौलीबाट चितवनको भरतपुरसम्म २२० केभीको ३६ किलोमिटर डबल सर्किट प्रसारण लाइन निर्माण कार्य गरिरहेको छ । प्रसारण लाइन निर्माणको काम दुई वर्षअघि नै सक्नुपर्नेमा म्याद थपेर आउँदो पुससम्म पुर्‍याएको आयोजनाले जनाएको छ ।