चितवन, १४ माघ । चितवनको बकुलहर रत्ननगर अस्पतालमा आइतवारबाट निःशुल्क शव वाहन सेवा सुरु भएको छ ।

रत्ननगरका सर्वसाधारण जनतालाई निःशुल्क सेवा दिने उद्देश्यले रत्ननगर नगरपालिका र बकुलहर रत्ननगर अस्पतालले संयुक्त रुपमा शव वाहन सेवाको औपचारिक सुरुवात गरेका हुन् ।

बकुलहर रत्ननगर अस्पताल व्यवस्थापन समितिका अध्यक्ष गोपाल कर्माचार्यले अस्पतालमा आइतवारदेखि नै लागू हुने गरी निःशुल्क शव वाहन सेवा सुरु गरिएको जानकारी दिनुभयो ।

अस्पतालमा पछिल्लो समय बिरामीको चाप बढेको बताउँदै शव वाहनको अभावमा झेल्नु परेका यावत समस्यालाई पूर्णबिराम लगाउन निःशुल्क शव बहानको ब्यवस्थापन गरेको कर्माचार्यको भनाइ छ । कार्यक्रममा बोल्दै नगर स्वास्थ्य शाखा प्रमुख माधव पौडेलले बागमती प्रदेश स्वास्थ्य मन्त्रालयले दिएको शव वाहन (एम्बुलेन्स) को सम्पूर्ण व्यवस्थापन खर्च रत्ननगर नगरपालिकाले बेहोर्ने जानकारी दिनुभयो ।

नगर भित्रका नागरिकलाई निःशुल्क रुपमा सेवा दिने उद्देश्यले शव वाहन सेवा शुभारम्भ गरिएको भएतापनि नगर बाहिरका सेवाग्राहीका लागि भने केहि शुल्क लाग्ने उहाँको भनाइ छ ।
पछिल्लो समय अस्पतालमा विशेषज्ञ चिकित्सकको उपलब्धतासँगै स्वास्थ्य सेवा लिने सर्वसाधारण जनताको सङ्ख्या पनि बढ्दै गएको छ ।