काठमाडौँ २५ माघ । अमेरिकी फुटबल क्लब इन्टर मियामी हाल एसिया भ्रमणमा रहेको छ । अर्जेन्टिनी स्टार लियोनल मेस्सीसहितको इन्टर मियामीले एसिया भ्रमणका क्रममा विभिन्न राष्ट्रका टोलीसँग मैत्रीपूर्ण खेल खेलिरहेको छ । तर, हङ्कङ भ्रमणका क्रममा भने मेस्सीले मैत्रीपूर्ण खेल खेलेनन् । ह्यामस्ट्रिङ समस्याका कारण उनी खेल अवधिभर बेञ्चमै बसे । त्यसअघि साउदी अरेबियामा खेलिएको मैत्रीपूर्ण खेलमा भने उनी केही समय मैदानमा ओर्लिएका थिए ।
हङ्कङपछि मेस्सीसहित इन्टर मियामी जापान पुगेको थियो । जापानमा खेलिएको मैत्रीपूर्ण खेलमा पनि मेस्सी केही समय मैदानमा ओर्लिएका थिए । यो विषयलाई लिएर अहिले चीनमा मेस्सी र इन्टर मियामीको विरोध भइरहेको छ । चिनियाँ समर्थकहरुले इन्टर मियामी र मेस्सीमाथि खेलमा राजनीति मिसाएको आरोप लगाएका छन् । राजनीतिक कारणले नै मेस्सीले हङ्कङमा मैत्रीपूर्ण फुटबल नखेलेको आरोप चिनियाँ समथर्कहरुको छ ।
राज्य सञ्चालित मिडिया आउटलेट ग्लोबल टाइम्सले पनि मेस्सीले राजनीतिक कारणले नै हङ्कङमा मैत्रीपूर्ण खेल नखेलेको दाबी गरेको छ । हङ्कङमा मेस्सीको खेल हेर्न करिब ३८ हजार समर्थकले टिकट खरिद गरेका थिए । ३६ वर्षीय मेस्सीले नखेलेपछि ती समर्थकले आफ्नो पैसा फिर्ता हुनुपर्ने माग गर्दै आएका छन् ।