बेथानचोक गाउँ

काठमाडौं देखि करिब ४५ किलोमिटर दक्षिणमा बेथानचोक गाउँपालिका रहेको छ । यो गाउँपालिकाको कुल क्षेत्रफल १ सय १ वर्ग किलोमिटर रहेको छ । वि.सं २०७३ सालमा नेपालको नयाँ प्रादेशिक संरचना कायम गरिदा काभ्रेपलाञ्चोक जिल्लाको ढुङ्खर्क, चलाल गणेशस्थान, च्याम्राङबेसी, च्यासिङ खर्क र महांकालचौर गाउँ विकास समितिलाई समेटेर बेथानचोक गाउँपालिका घोषणा गरिएको थियो । बेथानचोक गाउँ पालिकाको उत्तरमा काभ्रेपलाञ्चोक जिल्लाको पनौती र नमोबुद्ध नगरपालिका, दक्षिणमा खानीखोला गाउँपालिका, पूर्वमा रोशी गाउँ पालिका रहेको छ भने पश्चिममा ललितपुर जिल्लाको महांकाल गाउँपालिका छ ।

समुद्री सतहबाट करिब ३ हजार १८ मिटर अग्लो स्थानमा रहेको बेथाञ्चोक नारायण मन्दिरको नामबाट बेथाञ्चोक गाउँपालिकाको नामाकरण गरिएको छ । पूर्वमेचीदेखि पश्चिम महाकालीसम्म फैलिएको हिमालय, महाभारत र चुरे गरी तीन प्रकारका पर्वत श्रृंखला नेपालमा रहेको छ । बेथानचोक गाउँपालिका भित्र महाभारत पर्वत श्रृंखला पनि पर्दछ । यो गाउँ पालिकाको सबै भन्दा उचाईमा नारायण मन्दिर पर्दछ । यो मन्दिर यही महाभारत पर्वत श्रृंखलाअन्तरगत पर्दछ । 

बेथानचोक गाउँपालिकाको ढुुङ्खर्कदेखि नारायणको मन्दिरसम्मको यात्रा थप रोचक छ । हिमाली हावासँगै उत्तरतर्फ लहरमा मिलेर बसेका सुनझै टलक्कै टल्केका हिमाल नियाल्दै वनपाखाका घुमाउरो र कच्ची सडकले थप मन रोमाञ्चित बनाउछ । पहाडी मनोरम दृश्यमा रमाउँदै वाइकमा आदिबाटोसम्म आनन्दले पुग्न सकिन्छ । त्यसपछि मन्दिरसम्म पुग्न ढुंगाको खुड्किलो बनाइएको छ । करिब डेढ देखि २ घन्टा जति उकालो ओरालो चढेपछि मन्दिर भएको ठाउँमा पुग्न सकिन्छ । जुन ठाउँमा पुगेपछि स्वर्ग भन्ने ठाउँ यही रहेछ भन्ने अनुभूति हुन्छ । पर्यटकहरुलाई यो ठाउँले मोहनी नै लगाउँदछ ।

यो नारायण मन्दिरको पनि आफ्नै इतिहास रहेको छ । सत्रौं शताब्दीमा भक्तपुरका राजा भूपतिन्द्र मल्लले यो डाँडामा भगवान नारायण रहेको भनि पत्ता लगाएको उल्लेख छ । राजा भूपतिन्द्रलाई चाँगुनारायणले दर्शन दिई यो डाँडामा बसाइँ सरेको सपनामा दिएपछि राजा त्यस स्थानमा गई पूजा अर्चाना गरेको उल्लेख छ । राजा त्यहाँ समय समयमा पुगी पुजाआजा गर्ने गरेको तर भगवान नारायणको मन्दिर निर्माण नगरेपछि त्यो स्थानलाई बेथान भनिन थालिएको त्यहाँका दिग्गज व्यक्तित्वहरुको भनाइ छ । 

बेथाञ्चोक गाउँपालिका– ३ नम्बर वडामा रहेको नारायण मन्दिर साउथ एसियामा फैलिएको महाभारत रेञ्जको काभ्रे जिल्लाकै सबैभन्दा अग्लो डाँडो हो । यो डाँडाबाट पूर्वको मकालुदेखि धौलागिरी हिमालय र पश्चिममा भारतको बिहारसम्म नियाल्न सकिन्छ । 

यस्तै यो नारायणको मन्दिरसँगै दुई वटा पौराणिक गुफा रहेको छ । जसलाई प्रचार गर्न सके पोखराको महेन्द्र गुफालाई समेत ओझेलमा पार्न सक्छ । यही पालिका भित्र तीनतले झरना पनि छ । जुन झरनाले पालिकाको सौन्दर्यलाई थप मजबुत बनाएको छ । यसैगरी पालिकाको पार्थली भन्ज्याङमा मानव निर्मित पर्यटकीय भ्यूटावर पनि त्यतिकै चर्चित छ । यहाँबाट पालिकाको प्रायः स्थानको अवलोकन गर्न सकिन्छ । 

आन्तरिक तथा बाह्य पर्यटकलाई गाउँ पालिकमा भित्र्याउन सके त्यहाँको स्थानीयको आम्दानीको स्रोत अझ बलियो हुने थियो । यहाँ भएका संरचना,, इतिहास र सस्कृतिलाई बेच्न सकेमात्र पालिकाको आम्दानी थप मजबुत बन्न सक्छ । त्यसैले यहाँको चर्चित नारायण मन्दिर, गुफा, तीन तले झरना, भ्यूटावरलगायतका स्थानमा जाने सिँढी बाटोको स्तरोन्नति, मन्दिरको जीर्णोद्धार, पर्यटकलाई बस्ने ठाउँ, फोहोर व्यवस्थापन गर्न जरुरी छ ।

०००