काठमाडौं । राष्ट्रिय स्वतन्त्र पार्टी (रास्वपा) सांसद हरि ढकाल बोलिरहेको समयमा माइक काटिएपछि प्रतिपक्षी सांसदहरूले उठेर विरोध जनाएका छन् । मंगलबार बसेको प्रतिनिधि सभा बैठकको आकस्मिक समयमा ढकालले बोल्न समय पाएका थिए ।

शुरूमा उनले भ्रष्टाचारका कारण सडक र पुलको बेहाल भएको कुरा राखे । उनले यही विषयमा बोल्न आकस्मिक समय माग गरेका थिए । त्यसपछि ढकालले विद्युत् महसुलको विषयमा कुरा गर्न खोजेका थिए । ‘हुन त सभामुखज्यूले यो विषयमा बोल्दा विषयमा केन्द्रित हुन भन्नुहोला, तर भ्रष्टाचारका विषय मध्यरातमा पनि आकस्मिक हुन्छन्,’ ढकालले भने । त्यसपछि सभामुख देवराज घिमिरेले आकस्मिक समयमा बोल्न समय दिएको विषयमा बोल्न आग्रह गरे ।

ढकालको माइक काटिएपछि विपक्षी सांसदले उभिएर विरोध जनाएका थिए । त्यसपछि सभामुखले रास्वपा सभापति रवि लामिछानेलाई बोल्न २ मिनेट समय दिए । लामिछानेले हरि ढकालले बोल्दै गर्दा लाइन काटिएकाले उनैलाई बोल्न दिन माग गरे । ‘विद्युत् महसुल भन्नेबित्तिकै लाइन काटिनु आपत्तिको विषय हो,’ लामिछानेले भने ।

त्यसपछि राप्रपा अध्यक्ष राजेन्द्र लिङ्देनले सभामुखले सांसदलाई बोल्ने विषयमा नियन्त्रित गर्ने कुरा अमान्य रहेको बताए । ‘तिमीले यो विषय मात्र बोल्न पाउँछौ भन्ने कुरा मान्य हुँदैन । सांसदको विशेषाधिकारलाई नियन्त्रित गर्ने कुरा मान्दैनौं,’ लिङ्दनले भने ।

त्यसपछि पनि विपक्षी सांसदले बोल्न पाउनुपर्ने माग गरेपछि सभामुख घिमिरेले सभाको मर्यादा पालना गर्न आग्रह गरे । उनले बाँकी विषय विशेष समयमा राख्न आग्रह गरे पनि रास्वपा सांसद नबसेपछि संसद्को काम प्रभावित भएको छ ।