काठमाडौं । नेपालले चालु आर्थिक वर्ष २०८०/८१ को ११ महिनाको अवधिमा करिब १३ खर्ब रुपैयाँको व्यापारघाटा व्यहोरेको छ । भन्सार विभागले सार्वजनिक गरेको तथ्याङ्कले जेठसम्म नोपलको व्यापारघाटा १३ खर्ब १४ अर्ब ४४ करोड १८ लाख ५८ हजार रुपैयाँ पुगेको देखाएको हो ।

नेपालले गत वर्षको सोही अवधिमा व्यापारघाटा १३ खर्ब ३७ अर्ब ३९ करोड ४५ लाख ८२ रुपैयाँ थियो । जुन गत वर्षको तुलनामा यो वर्ष १.७२ प्रतिशत घटेको विभागले जानकारी दिएको छ ।

नेपालले ११ महिनाको अवधिमा १ खर्ब ३९ अर्ब २६ करोड २३ लाख ३३ हजार रुपैयाँ बराबरको वस्तु निर्यात भएको छ । जसमा गत वर्षको तुलनामा यो वर्ष ३.०१ प्रतिशतले निर्यात घटेको हो । गत वर्षको सोही अवधिमा नेपालले १ खर्ब ४३ अर्ब ५८ करोड ६५ लाख ४४ रुपैयाँको वस्तु निर्यात गरेको थियो ।

यस्तै, नेपालले जेठसम्ममा १४ खर्ब ५३ अर्ब ७० करोड ४१ लाख ९२ हजार रुपैयाँको वस्तु आयात गरेको छ । गत वर्षको उक्त अवधिमा नेपालले १४ खर्ब ८० अर्ब ९८ करोड ११ लाख २६ हजार रुपैयाँको वस्तु आयात गरेको थियो । आयात गत वर्षको तुलनामा १.८४ प्रतिशतले आयात घटेको पनि विभागले बताएको छ ।

नेपालले १४ खर्बको आयात गर्दा सरकारले ३ खर्ब ८४ अर्ब ४७ करोड ७९ लाख २९ हजार रुपैयाँ राजश्व संकलन गरेको पनि विभागले जानकारी दिएको छ ।