काठमाडौँ, २ साउन । नेकपा एमालेका अध्यक्ष एवं प्रधानमन्त्री केपी शर्मा ओलीले पूर्व राष्ट्रपति विद्यादेवी भण्डारीको सदस्यता नविकरण नभएको बताएका छन् । शुक्रबारको पोलिटब्यूरो बैठकलाई सम्बोधन गर्दै अध्यक्ष ओलीले प्रर्व राष्ट्रपति भण्डारीको पार्टी सदस्यता नविकरण नभएको बताएका हुन् ।

उनले सदस्यता नविकरणका विषयमा केन्द्रीय कमिटीले निर्णय गर्ने बताए । ‘पार्टीको सदस्यता नवीकरण भएको छैन। सदस्यताको निर्णय कमिटीले गर्छ । विधिसम्मत छलफल गरेर निर्णय गर्ने हो ।’ उनले भने ।

ओलीले पूर्व राष्ट्रपति भण्डारी सक्रिय राजनीतिमा फर्कन नहुने बताए । ‘पूर्व राष्ट्रपति सक्रिय राजनीतिमा आउने कुरा पत्रिकाबाट मात्र थाहा भयो । उहाँलाई दुई पटक पार्टीले राष्ट्रपतिमा पठाएको हो । अहिलेको संवैधानिक व्यवस्था अनुसार फर्किनुहुन्न भनेर जिम्मेवारी दिइएको हो । उचालेका आधारमा उहाँ सक्रिय राजनीतिमा आउनु हुँदैन ।’ उनले भने ।

उनले पार्टी पद्धति र प्रक्रियाका विषयमा पार्टीभित्र छलफल हुने भएपनि पार्टीमाथि आक्रमण भएका बेला बाहिर गएर बोल्ने कुरा उचित नहुने समेत बताए । पार्टीका विरुद्ध ठुलो सङ्गठित हमला भइरहेको उल्लेख गर्दै उनले पार्टी भित्रबाट भएका हमला रोकिनुपर्ने बताए ।

पूर्व राष्ट्रपति भण्डारीले भने आफ्नो सदस्यता नविकरण भै सकेको बताउँदै पार्टी अध्यक्षमा आफ्नो दाबी रहने बताउँदै आएकी छन् ।