वीरगन्ज । चरित्र हत्या गर्न गलत र भ्रामक समाचार सम्प्रेषण गरिएको भन्दै ‘मधेस टुडे’ नामक अनलाइनका विरुद्धमा प्रेस काउन्सिलमा उजुरी परेको छ । जनता समाजवादी पार्टीका युवा नेता एजाज बाबुले उक्त अनलाइले आफुविरुद्ध गलत र भ्रामक समाचार लेखेको भन्दै प्रेस काउन्सिल नेपालमा उजुरी दिएका हुन् ।

संघीय सरकारका खानेपानी मन्त्री प्रदीप यादवसँग नाम जोडेर तथ्यहिन समाचार प्रकाशन गरिएको भन्दै उनले अनलाइनलाई कारबाहीको माग गर्दै उजुरी दिएका छन् । उक्त अनलाइनले बिहीबार ‘योजनाको चिठ्ठीका लागि खानेपानी मन्त्री यादवका एजेन्टको आतंक’ शीर्षकको समाचार सम्प्रेषण गरेको थियो । सो समाचार भ्रामक भएको भन्दै उनले अनलाइनलाई कारबाही गर्न काउन्सिलको ध्यानाकर्षण गराएका छन् ।

‘तथ्यहीन समाचारमा मेरो समेत नाम जोडेर प्रकाशन भएको रहेछ ।’ उजुरीमा उनले भनेका छन्, ‘पत्रकारिताको मूल्य, मान्यता र आचारसंहिताको ठाडो उल्लंघन गर्दै मेरो नाम जोडेर चरित्र हत्या गरि मान, प्रतिष्ठामा आघात पु¥याएकाले छानबिन गरि यसमा संलग्नलाई अबिलम्ब कारवाहीको लागि यो निवेदन पेस गरेको छु ।’
उनले एक दशकभन्दा लामो समयदेखि निष्ठाको राजनीति गरिरहेको भन्दै आरोप पुष्टि गर्न चुनौती समेत दिएका छन् । नेता बाबुले गलत मनशायका साथ कपोकल्पित रुपमा समाचार बनाइएको भन्दै त्यसप्रकारको गतिविधिमा आफ्नो कुनै प्रकारको संलग्नता नरहेको बताए । उनले मधेस टुडे अनलाइनलाई हदैसम्मको कारबाही गर्न माग पनि गरेका छन् । ‘निराधार, भ्रमपूर्ण समाचारमाथि अविलम्ब प्रतिबन्ध लगाई सम्बन्धितमाथि छानबिन गरि हदै सम्मको कारबाहीको माग गर्दछु ।’ उनले भनेका छन् ।