काठमाडौं । प्रमुख प्रतिपक्षी नेकपा (माओवादी केन्द्र) का सांसद माधव सापकोटाले काठमाडौंबाट बरामद २५ करोड रुपैयाँ बराबरको अवैध विदेशी मुद्राका बारेमा छानबिन गर्न उच्चस्तरीय समिति गठन गर्न माग गरेका छन् ।

आज (बुधबार) को प्रतिनिधि सभा बैठकमा बोल्दै उनले मुलुकमा आर्थिक अपराध मौलाउँदै गएकोप्रति समेत चिन्ता व्यक्त गरे । उनले यस्तो अपराध उच्च तहको संलग्नता बिना सम्भव नहुने भन्दै आवश्यक अनुसन्धान गर्न माग गरे। उनले घटनाको छानबिन गरी संलग्न जोसुकै भए पनि कानूनी दायरामा ल्याउन सरकारको ध्यानाकर्षण गराए ।

उनले भने, ‘यस्ता प्रकृतिका घटनामा भरिया र ड्राइभर मात्र पक्राउ पर्दछन् । केही समय ठूलाठूला समाचार बन्दछन् र निश्चित समयपछि सामान्य रुपमा जाने गरेको छ । हाम्रो दलको तर्फबाट, यो घटनाको लागि छानविन गर्न एउटा विशेष छानविन समिति गठन गरियोस् र यो घटनामा संलग्न उच्च तहका नेता एवं कर्मचारी भए पनि कानूनी दायरामा ल्याउन माग गर्दछु ।’ काठमाडौं प्रहरीले करिव २५ करोड नगदसहित एक जनालाई पक्राउ गरेको थियो । अमेरिकी डलर र युरोसहित दुई जनालाई पक्राउ गरी मंगलवार सार्वजनिक गरिएको छ ।