काठमाडौं । अमेरिकामा ग्रीनकार्डधारीमाथि दुर्व्यहार भएको छ ।

लोगान विमानस्थलमा ग्रीनकार्डधारी फेबियन श्मिटमाथि गत शुक्रबार लक्जमबर्गबाट ​​अमेरिका फर्किने क्रममा दुर्व्यहार भएको हो । श्मिट न्यु ह्याम्पशायरका बासिन्दासमेत हुन् । उनलाई विमानस्थलमा पक्राउ गरी हिंसात्मक रूपमा सोधपुछ गरिएको र नाङ्गो पारिएको अन्तर्राष्ट्रिय सञ्चारमाध्यमले जनाएका छन् ।

श्मिटकी आमा एस्ट्रिड सिनियरले न्यूजवीकलाई बताइन्, “उनलाई नाङ्गो पारियो, हिंसात्मक रूपमा सोधपुछ गरिएको थियो र पछि ICE (अमेरिकी आप्रवासन र भन्सार प्रवर्तन) हिरासत सुविधामा सारियो ।”

छोराको ग्रीनकार्डलाई ‘फ्ल्याग’ गरिदिएको मात्रै बताइएको श्मिटकी आमाले भनिन् । छोरालाई जबरजस्ती नाङ्गो पारेर चिसो पानी खन्याइएको पनि उनले बताइन् । ग्रीनकार्ड हराएपछि सन् २०२३ मा श्मिटले कार्डको प्रतिलिपि लिएका थिए । श्मिटको ग्रीनकार्ड हालसालै नवीकरण गरिएको थियो र उनीविरुद्ध कुनै पनि अदालती मुद्दा विचाराधीन नभएको परिवारको भनाइ छ ।

श्मिटको पार्टनर उनलाई विमानस्थलमा लिन आएकी थिइन् । श्मिटलाई उनले चार घण्टा पर्खिन् । उनी बाहिर नआएपछि अधिकारीहरूलाई सम्पर्क गरिन् । श्मिटको परिवारले उनलाई हिरासतमा राख्नुको जवाफ खोजिरहेको छ । उनको रिहाइ सुनिश्चित गर्न काम पनि भइरहेको छ ।

सङ्घीय गोपनीयता नियमहरूको कारणले गर्दा अमेरिकी भन्सार तथा सीमा सुरक्षा विशेष केसहरूको बारेमा विवरणहरू खुलासा नगरिएको अध्यागमनका अधिकारीहरूले बताएका छन् ।

श्मिटको गिरफ्तारीपछि सामाजिक सञ्जालमा व्यापक आक्रोश देखिएको छ । ट्रम्प प्रशासनको कठोर आप्रवासन नीतिप्रति मानिसहरू चिन्तित हुन थालेका छन् । पछिल्लो समय अमेरिकामा बस्न वैध अनुमति पाएका विदेशीहरू पक्राउ पर्ने क्रम बढेको छ । यही शृङ्खलामा यो अर्को घटना मात्रै हो । यी घटनाहरूले अध्यागमन कानुनको सम्भावित दुरुपयोगबारे बहस सुरु भएको छ ।

सामाजिक सञ्जाल प्रयोगकर्ताहरूले डोनाल्ड ट्रम्पको राष्ट्रपतित्वमा अमेरिका “अब सुरक्षित छैन” र गैर-अमेरिकी नागरिकहरूले “बाध्यकारी व्यावसायिक कारण” नभएसम्म यात्रा गर्नबाट बच्नु पर्ने दाबी गरेका छन् ।

एक प्रयोगकर्ताले नयाँ ICE प्रक्रियाहरू “इजरायली फासीवादी प्रक्रियाहरू” को अवलम्बन भएको दाबी पनि गरे ।

एक प्रयोगकर्ताले सुझाव दिए, “यदि तपाईं अमेरिकी नागरिक हुनुहुन्न भने तपाईंसँग बाध्यकारी व्यावसायिक कारणहरू नभएसम्म अमेरिकाको यात्रा नगर्नुहोस् !”

“अमेरिका सभ्य देश होइन । यो वास्तवमा बर्बर छ,” अर्को प्रयोगकर्ताले भने ।

“अमेरिकामा पर्यटक अब सुरक्षित छैनन् । तिनीहरूले स्थायी बासिन्दाहरूलाई पनि यातना दिनेछन्,” एक प्रयोगकर्ताले भने ।