काठमाडौं । नेकपा (एमाले)का केन्द्रीय सदस्य विष्णु रिजालले परराष्ट्रमन्त्री आरजु राणा देउवालाई लोकलाजको ख्याल गर्न सुझाव दिएका छन् । आइतबार (चैत ३) सामाजिक सञ्जालमार्फत उनले भारतले आयोजना गर्ने राइसिना डाइलगमा पराष्ट्रमन्त्री १५ मिनेट बोल्नका निम्ति ६ दिनदेखि कुरेको भन्दै कटाक्ष गरेका हुन् ।

“परराष्ट्रमन्त्री डा. आरजु देउवा छ दिनदेखि भारतमा हुनुहुन्छ । भारतले आयोजना गर्ने राइसिना डाइलगमा बोल्नका लागि उहाँलाई बढीमा १५ मिनेट समय मिल्ला । अघिल्लोपटक परराष्ट्रमन्त्री एनपी साउदले अरू चारजना प्यानलिस्टसँगै एक घण्टाको प्यानलमा बोल्न पाँच दिन खर्चिनुभएको थियो । त्यसपछिका परराष्ट्रमन्त्री नारायणकाजी श्रेष्ठले बेइजिङमा चिनियाँ विदेशमन्त्री भेट्न नौ दिन खर्चिनुभएको थियो,” उनले लेखेका छन् ।

भारत र चीनले समकक्षीसँग छलफल गर्दा कति महत्त्व दिन्छन् भन्ने यसैबाट प्रस्ट हुने रिजालको भनाइ छ । “देशभित्र काम कति गर्नुहुन्छ भन्ने त थाहै छ, तर दुनियाँले के भन्छ भनेर लोकलाजको त अलिकति ख्याल गर्नुपर्ने हो । यस्ता परराष्ट्रमन्त्रीहरूले भारत र चीनका समकक्षीहरूसँग कुरा गर्दा कत्तिको समान हैसियत (इक्वायल फुटिङ)मा कुरा गर्दा हुन् र उनीहरूले कति महत्त्व दिँदा हुन् भन्ने यसैबाट स्पष्ट हुन्छ,” रिजालले लेखेका छन् ।आरजुलाई विष्णु रिजालले भने– लोकलाजको ख्याल गर्नुपर्छ