ललितपुर । ललितपुरको टीकाथलीमा गोदावरी खोला नजिकै बोरिङ गरेको ठाउँमा निस्किएको आगोकाे ज्वाला अढाइ घण्टापछि निभेको छ । बिहान करिब ९ः३० बाट सुरु भएको आगोको ज्वाला ११ः४० तिर निभाइएको हो । आगो निभे पनि यो ठाउँमा ग्यास भने अझै निस्किइरहेको छ ।

स्थानीयका अनुसार पानीका लागि बोरिङ गर्ने क्रममा ग्यास निस्किएको र आगो लागेको हो । बोरिङको पाइप गाडेको स्थानबाटै आगोको ज्वाला दन्किरहेको थियो । करिब नौ सय फिट खनिसकेपछि ग्यास निस्किएर आगो लागेको हो । बिहान ९ः३० बजे निस्किएको आगो झण्डै साढे दुई घण्टापछि नियन्त्रणमा आएको महालक्ष्मी नगरपालिका वडा नम्बर ५ का वडाध्यक्ष कपिल केसीले जानकारी दिए ।

‘हामीले सामान्य ग्यास होला भन्ठान्यौं । तर निभाउन निकै कठिन भयो । धेरैबेर पानी हालेपछि आगो ननिभेपछि ग्यास निभाउन तत्व नै ल्याएर नियन्त्रणमा लियौं,’ उनले भने । उनका अनुसार त्यहाँ ६०–७० लाख लागतमा खानेपानी आयोजना चलिरहेको छ । महालक्ष्मी नगरपालिका वडा नम्बर ५ शान्ति टोल आसपास समेत गरी करिब दुई हजार घरधुरीका लागि पानी अपुग भएपछि बोरिङ गरिएको हो ।