काठमाडौं, १७ फागुन । अमेरिकी राष्ट्रपति डोनाल्ट ट्रम्प र उनका युक्रेनी समकक्षी भ्लादिमिर जेलेन्स्कीबीच तिक्ततापूर्ण बहस भएको छ ।

राष्ट्रपति ट्रम्पसँग सुरक्षा ग्यारेन्टीको अपेक्षासहित ह्वाटइहाउस पुगेका जेलेन्स्की र युक्रेनको प्राकृतिक स्रोतमा पहुँच खोजेका ट्रम्पबीच कुरा नमिल्दा दुई नेताबीचको वार्ता तिक्ततापूर्ण भएको हो ।
वार्ता असफल भएपछि अमेरिकी अधिकारीहरुले समयभन्दा अघि नै युक्रेनी प्रतिनिधिमण्डललाई ह्वाइटहाउस छोड्न भनेका छन् । वार्ता असफल भएपछि संयुक्त पत्रकार सम्मेलन पनि रद्द गरिएको छ ।
अमेरिकी राष्ट्रपति ट्रम्प र उपराष्ट्रपति जेडी भ्यान्ससँगको बैठक सुरु भएको केही बेरमै तनावपूर्ण झगडामा परिणत भएको थियो ।

संचारमाध्यमलाई समेत पुहँच दिइएको सो बैठकमा राष्ट्रपति ट्रम्पले जेलेन्स्कीलाई कृतघ्न भएको र युक्रेन द्वन्द्व अन्त्य गर्न वार्ता गर्न अनिच्छुक भएको आरोप लगाए।

तनावपूर्ण बैठककै बीचमा ट्रम्पले जेलेन्स्कीलाई रूससँग शान्तिवार्ता गर्नुपर्ने बताएका थिए । त्यसपछि जेलेन्स्कीले अडान लिँदै अमेरिकी सहयोग निरन्तर जारी रहनुपर्ने माग गरे। ट्रम्पले युद्धविराम गरेर आफ्ना नागरिकलाई मर्नबाट जोगाउन र संकटपूर्ण अवस्थामा पुगेको देशलाई शान्तिको मार्गमा लैजान आग्रह गरेका थिए । तर जेलन्स्कीले रुसी राष्ट्रपति पुटिन अतिक्रमणकारी भएको जिकिर गर्दै विना सुरक्षा ग्यारेन्टी युद्धबिराम हुन नसक्ने प्रष्ट पारे ।

युक्रेनका दुर्लभ प्राकृतिक खनिज स्रोतहरूसँग सम्बन्धित सम्झौताको बदलामा जेलेन्स्की अमेरिकाबाट सुरक्षा ग्यारेन्टी चाहेका थिए । तर सो ग्यारेन्टी दिन ट्रम्पले अस्वीकार गरे ।

बुधबार मात्र युक्रेनी सरकारले दुर्लभ खनिज सम्झौतामाथि समीक्षा गर्दै राष्ट्रपति जेलेन्स्कीलाई हस्ताक्षरका लागि स्वीकृति दिएको थियो । तर शुक्रबार ह्वाइट हाउसमा भएको तनावपूर्ण भेटपछि सम्झौता अनिश्चित अवस्थामा पुगेको छ।

उपराष्ट्रपति भ्यान्सले ट्रम्पको भनाइ दोहोर्‍याउँदै जेलेन्स्कीले अमेरिका प्रति पर्याप्त सम्मान र आभार देखाउन नसकेको आरोप लगाए।

फक्स न्यूजले ह्वाइट हाउसका एक अज्ञात कर्मचारीलाई उद्धृत गर्दै भनेको छ, युक्रेनी प्रतिनिधिमण्डलले भेट पुनः सेट गर्न आग्रह गरिरहेका थिए, तर विदेश मन्त्री मार्को रुबियो र राष्ट्रिय सुरक्षा सल्लाहकार माइक वाल्ट्जले जेलेन्स्कीलाई ह्वाइट हाउसको क्षेत्र छोड्न निर्देशन दिए । ती कर्मचारीले भनिन्, ‘जब उनी शान्तिका लागि तयार हुन्छन्, तब मात्र फर्कन सक्छन्।