काठमाडौं । ढाकामा नेपाली सेना दिवस मनाइएको छ । बङ्गलादेशको राजधानीमा रहेको नेपाली दूतावासको आयोजनामा २६२ औं नेपाली सेना दिवसको अवसरमा एक कार्यक्रम आयोजना गरिएको हो ।

दूतावासले दिएको जानकारी अनुसार सेना दिवसले नेपाली सेनाले नेपाल र नेपालीको लागि गरेको समर्पण, निष्ठा र सेवाको स्मृतिको प्रतीक भएको राजदूत घनश्याम भण्डारीले बताएका थिए । राजदूत भण्डारीले नेपाल र बङ्गलादेशको सैन्य सहकार्यको पनि चर्चा गरेका थिए । कार्यक्रममा सैन्य सहचारी कर्नेल अञ्जन केशर खत्रीले नेपाली सेनाको योगदानको चर्चा गरेका थिए । नेपालको सामाजिक आर्थिक विकासमा सेनाको योगदान रहेको खत्रीले उल्लेख गरेका थिए ।

संयुक्त राष्ट्रसंघको शान्ति सेनामा नेपाली सेनाको योगदानले विश्व शान्तिमा साथ दिएको चर्चा खत्रीले कार्यक्रममा बोलेका थिए । कार्यक्रममा प्रमुख अतिथि बङ्गलादेशका प्रधानसेनापति वाकर उज जमान रहेका थिए । जमानले नेपाल र बङ्गलादेशको सैन्य सहकार्यले दुई देशको सम्बन्धमा महत्त्वपूर्ण योगदान दिएको भन्दै नेपाली सेनाले स्वदेश र विदेशमा राम्रा कामहरु गरेको बताए । सोमबार साँझ भएको कार्यक्रममा १७० भन्दा धेरै विभिन्न सरकारी निकाय, उच्च पदस्थ व्यक्तित्व तथा कूटनीतिक वृत्तका अनुहारहरूको उपस्थिति थियो ।