काठमाडौं । प्रधानमन्त्री केपी शर्मा ओलीले आइतबार केपी ओली फुटबल प्रतियोगिताको उदघाटनका क्रममा जन्मदिन मनाएका छन् । प्रतियोगिताको उदघाटनमा पत्नी राधिका शाक्यसहित उपस्थित भएका प्रधानमन्त्री ओलीले केक काटेर जन्मदिन मनाएका हुन् । सहभागी अन्य अतिथिले पनि ओलीलाई शुभकामना दिएका छन् ।

उदघाटन समारोहमा वरिष्ठ हाँस्य कलाकार हरिवंश आचार्य, गायक बद्री पंगेनी, महेश काफ्ले, अस्मिता अधिकारी, समीक्षा अधिकारी लगायतका कलाकारको समेत उपस्थित छ । कलाकारहरूले सांगीतिक प्रस्तुति समेत दिएका छन् ।
प्रतियोगितामा ६ ‘ए’ डिभिजन टोली, दुई विदेशी र एक आयोजक गरी ९ टोलीले प्रतिस्पर्धा गर्नेछन् ।

 राष्ट्रिय युवा संघ नेपालको आयोजनामा हुने प्रतियोगिताका प्रतिस्पर्धी अन्य टोलीमा संकटा, मछिन्द्र क्लब र भुटानको ट्रान्सपोर्ट युनाइटेड छन् । विजेताले १५ लाख ११ हजार १ सय ११ र उपविजेताले ५ लाख रुपैयाँ पुरस्कारसहित ट्रफी जित्नेछ । प्रतियोगिताको उत्कृष्ट खेलाडीलाई १ लाख, उच्च गोलकर्ता, उत्कृष्ट गोलरक्षक, उदीयमान खेलाडीलाई ५० हजारले पुरस्कृत गर्ने आयोजक संघका अध्यक्ष एवं प्रतियोगिता संयोजक क्षितिज थेबेले जानकारी गराए । हरेक प्लेयर अफ द म्याचले १५ हजार पाउने छन् ।