नेपालगन्ज, ११ असोज । श्रृङखलाबद्धरुपमा चिकित्सक तथा स्वास्थ्यकर्मीमाथि आक्रमण हुन थालेपछि बाँकेका चिकित्सकपनि कामकाज ठप्प पारेर सडकमा निस्किएका छन् । नेपाल चिकित्सक संघको आह्वानमा बाँकेका सरकारी तथा निजी अस्पतालका चिकित्सकहरुले काम बन्द गरेर सडकमा उत्रिएका हुन् । आज बाँकेका सरकारी तथा निजी अस्पतालहरुको आकस्मिक बाहेकका सबै सेवा बन्द हुने चिकित्सक संघ बाँकेले जनाएको छ ।

चिकित्सकमाथि सुनियोजितरुपमा गरिएका सांघातिक आक्रमणले ढुक्क भएर बिरामीको सेवा गर्ने अवस्था नरहेपछि आन्दोलनमा उत्रनु परेको संघका बाँके अध्यक्ष डा.बिनोद कुमार थापाको भनाइ छ । उहाले सरकारले दोषीमाथि कारवाही गर्नुपर्ने र यस्ता घटना दोहोरिन नदिने प्रतिबद्धता नआएसम्म आन्दोलन जारी रहने बताउनुभयो । चिकित्सक संघले आजदेखि निजी क्लिनिकमा समेत सेवा नदिने निर्णय पनि गरेका छन् । नेपालगन्जमा बरिष्ठ सर्जन डा. श्यामसुन्दर यादवको संयोजकत्वमा आन्दोलन थालिएको भेरी अस्पतालका बरिष्ठ फिजिसियन डा. राजन पाण्डेले बताउनभयो ।

पोखरा, हेटौडा, गुल्मी, मोरङलगायतका जिल्लामा श्रृङखलाबद्धरुपमा डाक्टर तथा स्वास्थ्यकर्मीमाथि आक्रमण भएको छ । पछिल्लो पटक मणिपाल अस्पताल पोखरामा सहकर्मी कुटिएपछि डाक्टरहरु सुरक्षा खोज्दै आन्दोलनमा उत्रिएका छन् ।