एक हप्ताभित्र टोलटोलमा सुरक्षा समिति बनाउन निर्देशन

काठमाडौं, ३ पुष । नेकपा एमालेका अध्यक्ष केपी शर्मा ओलीले सरकारले एमाले नेतृत्वलाई छोएकै दिन देश ठप्प हुने चेतावनी दिएका छन् ।

११औं महाधिवेशनबाट अध्यक्षमा निर्वाचित भएलगत्तै महाधिवेशन समापन समारोहलाई सम्बोधन गर्दै अध्यक्ष ओलीले यस्तो चेतावनी दिएका हुन् । एमाले नेतृत्वलाई घेरा हाल्ने, पक्राउ गर्ने जस्ता हल्ला सुनिएको भन्दै उनले त्यस्तो भए तत्कालै देश ठप्प पार्न नेता कार्यकर्तालाई निर्देशन दिए । उनले अपराधिक तत्वहरुले अराजकता फैलाउन खोजेको जिकिर गर्दै त्यस्ता तत्वहरुलाई नियन्त्रण गर्न टोलटोलमा सुरक्षा समिति बनाउन पनि निर्देशन दिए ।

ओलीले अहिले देशमा अराजकता मच्चाउन खोजिएको र एमालेले त्यसलाई रोक्ने दाबी गरे। उनले सरकारको मात्रै भर पर्दा धोका पाउन सकिने भन्दै एक हप्ताभित्र देशभर टोल–टोलमा सुरक्षा समिति बनाउन निर्देशन दिएका हुन्। उनले भने, ‘देशमा अहिले असुरक्षा रहेको छ । त्यसैले आफ्नै खुट्टामा उभिएर आफ्नै सुरक्षा गर्नुपर्ने अवस्था छ । टोल–टोलमा सुरक्षा समिति अविलम्ब बनाउनुहोस्। एक हप्ताभित्र।’ उनले अन्य पार्टीहरुलाई पनि यस्तै काम गर्न आग्रह गरे ।

अध्यक्ष ओलीले सही कुरा गर्न नडराउन सबैलाई आग्रह गरे । उिद्योग व्यवसायीहरूलाई सम्बोधन गर्दै एक समय आगो लगाउन आए पनि अब त्यस्ता कुराले स्थान नपाउने भन्दै भरोसा दिने काम गरे । अब उद्योगीव्यवसायीको रक्षा पनि एमालेले गर्ने उनले बताए ।

ओलीले सरकारले जेनजीहरुसँग गरेको १० बुँदे सम्झौता एमालेले खारेज गर्ने बताए । उनले यस्तो असंवैधानिक सम्झौता लागु हुन नदिने दाबी गरे । यो सरकारले चुनाव नचाहेको उल्लेख गर्दै उनले सर्वोच्चले संसद पुनस्र्थापना गर्नुपर्ने बताए ।