नेपालगन्ज, ६ बैशाख । बाँके प्रहरीले चैत्र महिनामा मात्र १२८ ग्राम ब्राउन सुगर बरामद गरेको तथ्याङ्क सार्वजनिक गरेको १ साता पूरा नहुँदै प्रहरीलु ठूलो मात्रामा ब्राउनसुगरसहित एक जनालाई पक्राउ गरेको छ ।

भारतको रुपैडिहाबाट पैदल नेपालगन्ज तर्फ आइरहेका जुम्ला चन्दननाथ नगरपालिका वडा नम्बर ५ का २२ वर्षीय प्रवेश सुनारलाई प्रहरीले जमुनाहा नाकाबाट ३३ ग्राम ४ सय मिलिग्राम ब्राउनसुगरसहित पक्राउ गरेको छ । सुनारले लगाएको जिन्स पाइन्टको बायाँ खल्तीमा ब्राउनसुगर बरामद भएको प्रहरीले जनाएको छ ।
पैदल आइरहेका सुनारको गतिबिधिबाट शंका लागेर जाँच गर्दा सुनारको साथबाट ब्राउनसुगर फेला परेको बाँके प्रहरी प्रवक्ता डीएसपी दिपक पातलीले जानकारी दिए । ठुलो परिमाणको ब्राउनसुगर उनले बिक्री गर्न ल्याएको हुन सक्ने प्रहरीको अनुमान छ । सुनारको बयानका आधारमा थप लागु औषध कारोबारमा संलग्नहरुको खोजी तिब्र पारिएको डिएसपी पतालीले बताए ।
सीमावर्ती भारतीय बजारबाट बाँकेलगायत छिमेकी जिल्लाका युवाले नेपालगन्ज नाका हुँदै लागु औषध नेपाल भित्राउने र नेपालगन्ज हुँदै देशका विभिन्न शहरमा पुग्ने गरेको छ । प्रहरीले हरेकपटक लागु औषध ओसारपसार गर्ने भरियालाई पक्राउ गरेपनि कारोबारमा संलग्न गिरोहलाई भने पक्राउ गर्न सकेको छैन ।