काठमाडौं । उत्तर म्यासेडोनियाको एक नाइट क्लबमा भएको आगलागीमा दर्जनौँ मानिसको मृत्यु भएको आशङ्का गरिएको छ।

राजधानी स्कोप्जेबाट करिब १०० किमि पूर्वमा रहेको कोचानि सहरको पल्स क्लबमा आइतबार बिहानैदेखि आगलागी भएको हो । सामाजिक सञ्जालमा पोस्ट गरिएका फुटेजहरूमा भवन पूरै जलेको र धुवाँ आकाशमा उडिरहेको देख्न सकिन्छ।

५० जनासम्मको मृत्यु र सयौँ घाइते भएको हुनसक्ने स्थानीय सञ्चारमाध्यमहरूले उल्लेख गरेका छन् । तर यसको आधिकारिक पुष्टि हुन भने बाँकी नै छ । रिपोर्टकाअनुसार, एडीएन ब्यान्डको प्रस्तुति भइरहेका बेला आगलागी सुरु भएको थियो । घटनाको बेला १५ सयभन्दा बढी मानिस कन्सर्टमा उपस्थित रहेको बीबीसीले जनाएको छ ।