सल्यान । सडक स्तरवृद्धिका लागि मदन भण्डारी राजमार्ग अन्तर्गत सल्यानको बागचौर नगरपालिका–७ गैरिगाउँ–धामीगाउँ–पिपलबोटदेखि पोखरा नेटासम्मको सडकमा एक साताको लागि यातायात सञ्चालन बन्द गरिएको छ । जिल्लाको बागचौर नगरपालिकाले एक सूचना प्रकाशन गर्दै यातायात सञ्चालन बन्द गरेको हो ।

बाग्चौर नगरपालिकाका निमित्त प्रमुख प्रशासकीय अधिकृत हरिबहादुर कठायतले निर्माणको काम धमाधम भइरहेको र सडक चौडा गराउने क्रममा ढुंगामाटो सडकमै थुपारेका कारण यात्रुलाई आउजाउमा असहज हुने भन्दै सडक निर्माण कम्पनीको सहकार्यमा यातायात सेवा चैत्र २ गते सम्मका लागि बन्द गरिएको बताए । निर्माणको काम भइरहेको सडकमा यातायात सञ्चालन गर्दा यात्रुलाई समस्या मात्र नभइ धेरै सास्ती हुने र निर्माणको काम समेत प्रभावित हुने भएकाले यातायात सञ्चालन बन्द गर्नुपरेको उनको भनाइ छ । सडकमा थुपारेका ढुंगामाटोले यातायात पूर्णरुपमा ठप्प भएका कारण यात्रुलाई वैकल्पिकमार्ग प्रयोग गर्न निमिक्त प्रमुख प्रशासकीय अधिकृत कठायतले सबैलाई आग्रह गरेका छन् ।

यस्तै, कपुरकोट गाउँपालिका–६ टुनिबोट–कोइला सडक खण्डको स्तरवृद्धि गर्ने क्रममा घुरखोला, पिपलकोट नजिकै कल्भर्ट निर्माणको काम भइरहेकाले काम सम्पन्न नहुँदासम्म यातायात सञ्चालनमा रोक लगाएको र स्थानीय यात्रुलाई वैकल्पिक मार्ग प्रयोग गर्न आग्रह गरिएको गाउँपालिका अध्यक्ष दुर्गाबहादुर पुनले बताएका छन् ।