बुटवल । सत्तारुढ नेपाली कांग्रेसको नीति, अनुसन्धान तथा प्रशिक्षण प्रतिष्ठानले आज (सोमबार) देखि रुपन्देहीको भैरहवामा राष्ट्रियस्तरको दुई दिने प्रशिक्षण कार्यक्रम गर्दैछ । देशभरका १६५ क्षेत्रीय सभापतिहरू प्रशिक्षणका लागि भैरहवा आइपुगेको क्षेत्रीय सभापति सुशील गुरुङले जानकारी दिए । प्रशिक्षणको पार्टी सभापति शेरबहादुर देउवाले उद्घाटन गर्ने कार्यक्रम छ ।

प्रशिक्षणमा पार्टीलाई कसरी संस्थागत र बलियो बनाउने भन्ने विषयमा छलफल हुने कांग्रेसले जनाएको छ । नीति अनुसन्धान प्रतिष्ठानका प्रमुख एवम् उपसभापति पूर्णबहादुर खड्काका अनुसार सोमबार र मंगलबार हुने प्रशिक्षणमा मुलुकभरका क्षेत्रीय सभापति, क्षेत्रीय प्रशिक्षण प्रतिष्ठान प्रमुख र एउटै निर्वाचन क्षेत्र भएका जिल्लाका सभापति र उपसभापति समेत गरेर ३३० जनाभन्दा बढी नेता कार्यकर्ताहरू भैरहवा आएका छन् ।

प्रशिक्षणका लागि महामन्त्रीद्वय गगन थापा र विश्वप्रकाश शर्मा पनि सोमबार आउँदै छन् । गृहमन्त्री रमेश लेखक पनि सोमबार नै भैरहवा आउने कार्यक्रम रहेको जनाइएको छ । नेता शेखर कोइराला र मिनेन्द्र रिजाललगायत नेताहरू भने शनिवारदेखि नै रुपन्देहीमै छन् । यसअघि कांग्रेसले माघ २२ र २३ गते प्रशिक्षण प्रतिष्ठानको आयोजनामा कास्कीको पोखरामा ७७ वटै जिल्लाका सभापति, ७७ वटै जिल्लाका प्रशिक्षण शाखा प्रमुख तथा उपसभापतिलाई राखेर प्रशिक्षण तथा अभिमुखीकरण कार्यक्रम गरेको थियो ।

उक्त कार्यक्रममा केन्द्रीय सदस्यसहित कांग्रेसमा इतर समूहको नेतृत्व गरिरहेका डा. शेखर कोइरालालाई निम्तो दिइएको थिएन । उनीलगायत केही नेतालाई नबोलाएपछि नेतृत्वको चर्को आलोचना भएको थियो । यस पटक भने शेखरसहितका नेतालाई पनि बोलाइएको छ । पोखरको कार्यक्रममा निम्तो नै नदिइएको शेखरलाई यस पटक भने निम्तो दिइएको उनका सहयोगी दिनेशचन्द्र थपलियाले जानकारी दिए ।

‘चार दिनअघि पार्टी केन्द्रीय कार्यालयका एक कर्मचारीले टेलिफोन गरेर कार्यक्रमबारेमा जानकारी गराउँदै सहभागिताका लागि निम्तो दिनुभएको थियो,’ उनले भने, ‘त्यसै पनि उहाँको पूर्व निर्धारित कार्यक्रम तय भइसकेको छ । उहाँ भैरहवाको कार्यक्रममा जानु हुँदैन ।’ थपलियाका अनुसार कोइराला आजै विराटनगर जाँदैछन् । उनी विराटनगरमै सुरु हुने विराट गोल्डकपको उद्घाटन समारोहमा सहभागी हुन जान लागेको उनले जानकारी दिएका छन् । भोलि पनि विराटनगरमै केही कार्यक्रमहरु तय भएको थपलियाको भनाइ छ ।