काठमाडौँ । फागुन ३ गते पोखरा भ्रमण वर्ष उदघाटन कार्यक्रममा हाइड्रोजन ग्यास भरिएको बेलुन विस्फोट हुँदा जलेर अर्थमन्त्री विष्णु पौडेल र पोखरा महानगरका प्रमुख धनराज आचार्य घाइते भएका थिए ।

भियतनाममा पनि केही दिन अघि यस्तै प्रकारको एउटा घटना भएको छ । उक्त घटना सरकारी स्तरको कार्यक्रममा नभएर एक युवतीले आफ्नो जन्मदिन मनाउने क्रममा भएको हो ।

उक्त दुर्घटनाको भिडियो सामाजिक सञ्जालमा भाइरल भएको छ । हनोइमा भएको भनिएको सो घटनामा युवतीले केकमा बालिएको मैनबत्ती फुक्ना साथ हाइड्रोजन ग्यास भरिएको बेलुन विस्फोट भएको भिडियोमा देखिन्छ ।

ती युवतीले एउटा रेस्टुरेन्टमा जन्मदिनको कार्यक्रम आयोजना गरेकी थिइन् । रेस्टुरेन्टमा हाइड्रोजन ग्यास भरिएका बेलुनले सजाइएको थियो । सोही क्रममा मैनबत्तीको नजिकै आइपुगेको एउटा बेलुन पड्कियो र आगोको मुस्लोले ती युवती घाइते भइन् ।