रुसको राजधानी मस्कोमा भएको विस्फोटमा रुसी सेनाका जनरल तहका एक सैन्य अधिकारीसहित दुई जनाको ज्यान गएको छ ।

विस्फोटमा रुसको विकिरण, रासायनिक तथा जैविक संरक्षण सेनाका प्रमुख लेफ्टिनेन्ट जनरल इगोर किरिलोभ र उहाँका सहकर्मीको ज्यान गएको बीबीसीले जनाएको छ । रुसी अनुसन्धान समितिका प्रवक्ता स्वेतलाना पेट्रेन्कोले विद्युतीय स्कुटरमा राखिएको उपकरण पड्किएको बताउनुभएको खबरमा उल्लेख छ ।

अक्टोबरमा बेलायतले युक्रेनविरुद्धको युद्धमा रासायनिक हतियारको प्रयोगलाई बेवास्ता गरेको भन्दै जनरल किरिलोभमाथि प्रतिबन्ध लगाएको थियो ।

यसैबीच युक्रेनले रुसी सेनाका जनरल इगोर किरिलोभाको हत्या गरेको दाबी गरेको छ । युक्रेनी सञ्चारमाध्यमले पनि लेफ्टिनेन्ट जनरल किरिलोभलाई युक्रेनी सुरक्षा सेवाले मारेको जानकारी दिएका खबरमा उल्लेख छ ।

रुसले किरिलोभको हत्यालाई ‘आतङ्कवादी कार्य’ भनेर टिप्पणी गरेको छ । रुसी अधिकारीहरूले किरिलोभको हत्याका लागि पश्चिमा देशलाई दोष दिएका छन् ।