काठमाडौं । अमेरिकाको जर्जियास्थित एक विद्यालयमा १४ वर्षीय बालकले गोली प्रहारगरी ४ जनाको हत्या गरेका छन् । विन्डरस्थित एक हाईस्कुलमा गएराति भएको गोलीकाण्डमा दुई विद्यार्थी र दुई जना शिक्षकको ज्यान गएको सीएनएनले जनाएको छ ।

मारिनेमा शिक्षक क्रिस्टिना इरिमी र रिचर्ड एस्पिनवाल र १४ वर्षीय विद्यार्थी मेसन शेर्मरहोर्न र क्रिस्चियन एन्जेलो रहेको समाचारमा उल्लेख छ । गोली लागेर ९ जना घाइते भएका छन् । उनीहरूलाई अस्पताल भर्ना गरिएको छ। स्कुलमा गोली चलाउने १४ वर्षीय बालक कोल्ट ग्रे रहेको त्यहाँको प्रहरीले जनाएको छ । उनलाई नियन्त्रणमा लिएको छ । उनले प्रयोग गरेको बन्दुक एआर-प्लेटफर्म शैलीको हतियारु भएको प्रहरीको भनाइ छ ।

कोल्ट ग्रेलाई हत्याको अभियोग लगाइने भएको छ । उसलाई वयस्कको रूपमा मुद्दा चलाइनेछ । विद्यालयमा करिब १९०० विद्यार्थी अध्ययनरत छन् । गोली चलेको खबर पाएर प्रहरी पुगेपछि आक्रमणकारी आत्मसमर्पण गरी भुइँमा पल्टेका थिए । पक्राउ परेका आक्रमणकारी सोही विद्यालयमा अध्ययन गर्ने विद्यार्थी हुन् । कोल्ट ग्रेको गतिविधिमा एफबीआईलाई पहिले नै शंका थियो र गत वर्ष मेमा उनको परिवारसँग सोधपुछ गरेको थियो । त्यसबेला उनले सामाजिक सञ्जालमा विद्यालयमा गोली हान्ने धम्की दिएका थिए तर त्यतिबेला उनी पक्राउ परेनन् ।