काठमाडौं, १० भाद्र । राष्ट्रपति रामचन्द्र पौडेलले श्रीकृष्णजन्माष्टमी पर्वको उपलक्ष्यमा ललितपुरको पाटनमा रहेको कृष्ण मन्दिर पुगेर पूजाअर्चना गर्नुभएको छ । उहाँले पुजारीबाट टीका र प्रसाद ग्रहण गर्नुभएको छ ।

राष्ट्रपति पौडेललाई पाटन कृष्ण मन्दिरमा ललितपुर महानगरपालिकाका पदाधिकारीहरू र सांसदलगायतले स्वागत गरेका थिए ।

वैदिक सनातन हिन्दू धर्मावलम्बीले श्रीकृष्णजन्माष्टमी आज देशभर भगवान् श्रीकृष्णको पूजा आराधना गरी मनाउँदै छन् । द्वापरयुगमा भाद्र कृष्ण अष्टमीको मध्यरातमा भगवान् विष्णुको आठौं अवतारका रूपमा कृष्ण जन्मिएका विश्वास गरिन्छ ।

आज देशभरिका कृष्ण मन्दिरमा भगवान् श्रीकृष्णको पूजा–आराधना, प्रवचन, भजनकीर्तन गर्नुका साथै विशेषगरी महिला, पुरुष व्रत बसी रातभर जाग्राम बस्ने प्रचलन छ । आजको दिनलाई कृष्णअष्टमी र रातलाई मोहरात्रि भनिन्छ ।