काठमाडौं । ‘गेम्स वाइड ओपन’ यस वर्षको पेरिस ओलम्पिकको नारा हो, जुन औपचारिक रूपमा आज (शुक्रबार) उद्घाटन हुँदै छ । १०० वर्षमा पहिलोपटक फ्रान्सेली राजधानीले ग्रीष्मकालीन खेलहरू आयोजना गरेको छ । फ्रान्सको राजधानी रहेको पेरिसले एक शताब्दीको अन्तरमा पहिलोपटक ओलम्पिक आयोजना गरेको हो ।
अन्तर्राष्ट्रिय ओलम्पिक कमिटी (आईओसी) र फ्रान्स सरकारले ओलम्पिकको उद्घाटन समारोहलाई विशेष र फरक बनाउने प्रयास गरेको छ । ओलम्पिक खेलकुदको उद्घाटन पहिलोपटक रङ्गशाला बाहिर गरिन लागिएको हो ।सेन नदी फ्रान्सको सबैभन्दा प्रख्यात नदी हो । यो राजधानी पेरिस हुँदै पूर्वबाट पश्चिमतर्फ बग्छ । पेरिस भएर बग्ने प्रसिद्ध सेन नदीमा हुने उद्घाटन समारोह हुँदैछ ।फ्रान्सेली राष्ट्रपति इमानुएल म्याक्रोनले पेरिस ओलम्पिकका लागि देश तयार रहेको बताएका छन् ।
सन् १८९६ मा एथेन्समा ओलम्पिक शुरू भएको थियो । पेरिसले यसअघि सन् १९२० र १९२४ मा ओलम्पिक खेलकुद आयोजना गरेको थियो । लण्डनपछि तीनपटक ओलम्पिक आयोजना गर्ने यो दोस्रो देश बन्नेछ ।
मौलिक र अद्वितीय छनक दिन लागिएको उद्घाटन सत्रमा सहभागी खेलाडीले सेन नदीमा डुङ्गामा परेड गर्नेछन् । ओलम्पिकमा सहभागी प्रत्येक देशका लागि एउटा डुङ्गाको व्यवस्था गरिएको छ ।
फ्रान्सको राजधानी शहरमा २०६ राष्ट्रका १० हजार बढी खेलाडीको जमघट छ । आयोजकका अनुसार ओलम्पिक परेडमा १० हजार भन्दा बढी खेलाडीको सहभागिता रहनेछ । उक्त परेड सेन नदीको ६ किलो मिटर दूरीमा हुनेछ । जसमा दर्शकले सबैतिर छरिएर उद्घाटनको परेड हेर्न सक्नेछन् ।
कम्तीमा पनि ३ लाख २० हजार दर्शकले प्रत्यक्ष उद्घाटन समारोह हेर्नेछन् । सहभागी खेलाडीको परेड यही सेन नदीमाथि अगाडि बढ्ने डुंगामा हुनेछ । यसबीच १ सय ५० किलोमिटरको क्षेत्रको पेरिसको आकाश ‘नो फ्लाई जोन’ हुनेछ।
ओलम्पिक १६ दिन चल्नेछ । पेरिस शहरका लगभग सबै कुनामा कुनै न कुनै खेल हुनेछन् ।
यसअघिको ओलम्पिक महामारीको सिकार बनेको थियो । त्यसैले यसपल्टको ओलम्पिकमा खुसीयालीको कुनै सीमा हुने छैन । यही ओलम्पिकले सम्भवतः विश्व खेलकुदको महाकुम्भको भविष्य पनि निर्धारण गर्नेछ ।
सन् २०२१ को टोकियो ओलम्पिकमा लगभग दर्शक नै नभएको स्थिति थियो। यस्तोमा यसपल्ट दर्शकको ओलम्पिकमा पुनरागमन हुँदै छ । सन् २०२२ को शीतकालीन ओलम्पिक पनि चीनमा लकडाउनकै स्थितिमा भएको थियो ।
त्यसमध्ये सबैभन्दा बढी आकर्षण त ३ सय ३० मिनेट अग्लो आइफल टावर नै हुनेछ । आइफल टावरकै छेउमा बिच भलिबल आयोजना हुनेछ ।
सुरक्षाका लागि ४५ हजार प्रहरी तैनाथ हुनेछन् । सँगै हुनेछन् दस हजार सेना । कुल ३२ खेलको ३ सय २९ विधामा प्रतिस्पर्धा हुनेछ । पदकमा आइफल टावरबाट झिकिएको फलामको अंश पनि हुनेछ । प्रतियोगिताका क्रममा सेन नदीलाई पूर्ण सुरक्षामा राखिनेछ ।
प्रतियोगिताका कुल लागत ९ अर्ब युरो रहेको छ । त्यसमध्ये आधा त प्रायोजक, टिकट बिक्री र निजी क्षेत्रको कोषबाटै पूर्ति हुनेछ।
पेरिस शहरमा पछिल्लो समय शृंखलाबद्ध आतंककारी आक्रमण पनि भएका छन् । त्यसैले १० हजार ५ सय खेलाडी तथा तिनका खेल हेर्न आउने दसौं लाख पाहुनाको सुरक्षा सबैभन्दा ठूलो चुनौती हुनेछ ।
युक्रेन तथा गाजामा चलिरहेको युद्धका कारण अहिले विश्व राजनीति नै खलबलिएको छ। त्यसैले पनि ओलम्पिकका लागि सुरक्षा व्यवस्था आफैंमा चुनौतीपूर्ण बनेको छ
प्रतिक्रिया