काठमाडौं । प्रधानमन्त्री पुष्पकमल दाहाल ुप्रचण्डु नेतृत्वको सरकारले गत जेठ १५ गते ल्याएको बजेट राष्ट्रिय सभाबाट शुक्रबार पारित हुँदैछ । प्रतिनिधि सभाबाट असार ११ मा पारित भएर राष्ट्रिय सभामा पुगेको बजेट शुक्रबार पारित गर्ने कार्यसूची छ । बजेटको मूल विधेयक ‘विनियोजन विधेयक २०८१’ पारित गर्ने र पूरक विधेयकहरू संसद्‌मा टेबल गर्ने शुक्रबारको कार्यसूची छ ।

अर्थमन्त्री वर्षमान पुनले बजेट पारित गरियोस् भनेर प्रस्ताव पेश गर्नुअघि राष्ट्रिय सभामा मन्त्रीहरूले जवाफ दिने कार्यक्रम छ । शुक्रबार प्रधानमन्त्री तथा मन्त्रिपरिषद् कार्यालय, गृह मन्त्रालय लगायत मन्त्रालयमाथिका शीर्षका उठेका प्रश्नको मन्त्रीले जवाफ दिने कार्यक्रम छ । प्रतिनिधि सभाका प्रमुख दल नेपाली कांग्रेस र एमालेबीच केपी शर्मा ओलीको नेतृत्वमा सरकार गठन गर्ने गरी सहमति भइसकेको पृष्ठभूमिमा प्रचण्ड सरकारले ल्याएको बजेट राष्ट्रिय सभाबाट पारित हुन लागेको हो ।

साउन १ गतेदेखि बजेट कार्यान्वयनमा जाने भएकोले असार मसान्त अगावै बजेट पारित गरेर प्रमाणीकरणका लागि राष्ट्रपति समक्ष पठाउनु पर्ने बाध्यता छ । दुवै सदनबाट बजेट पारित गरेपछि प्रधानमन्त्री प्रचण्डलाई राजीनामाका लागि थप दबाब पर्नेछ । प्रमुख सत्तासाझेदार नेकपा एमालेले सरकारलाई दिएको समर्थन फिर्ता गरेर मन्त्रीसमेत फिर्ता गरेपछि प्रचण्ड सरकार अल्पमतमा परेको छ । संसद्‌मा विश्वासको मत लिने दाबी गर्दै आएका प्रचण्ड संसद्‌मा सम्बोधन गरेर राजीनामाको मनस्थितिमा पुगेको माओवादी स्रोत बताउँछ ।

प्रतिनिधि सभाको बैठक असार २३ गतेका लागि बोलाइएको छ । माओवादीका कतिपय नेताले संसद्‌मा विचाराधीन बजेट पारित नगरी राजीनामा गर्न नहुने धारणा राख्दै आएका थिए । कांग्रेस र एमालेले नयाँ सरकार गठनका लागि मार्ग प्रशस्त गर्न प्रचण्डलाई आग्रह गरेका छन् ।