काठमाडौं । सहकारी ठगी प्रकरणमा रवि लामिछाने मुछिएको दाबी गर्दै यसमाथि संसदीय छानबिन हुनुपर्ने माग राख्दै आएको नेपाली कांग्रेसले झापास्थित गिरीबन्धु टी स्टेटको मुद्दालाई पनि संसदको एजेण्डा बनाउने भएको छ ।

मंगलबार बिहान सिंहदरबारमा बसेको कांग्रेस संसदीय दलको बैठकले गिरीबन्धुको विषय पनि संसदमा उठाउने निर्णय गरेको हो । बैठकमा सहभागी कांग्रेसका एक सांसदले सहकारी ठगी प्रकरणको छानबिनसँगै गिरिबन्धु टी स्टेटको हदबन्दीभन्दा बढी जग्गा बिक्री गर्ने तत्कालीन सरकारको निर्णयविरुद्ध पनि अब कांग्रेसले संसदमा आवाज उठाउने बताउनुभयो ।

केपी शर्मा ओली नेतृत्वको तत्कालीन सरकारले गिरिबन्धु टी स्टेटको हदबन्दीभन्दा बढी जग्गा बिक्री गर्न दिने निर्णय लिएको थियो । यसविरुद्ध अधिवक्ता ओमप्रकाश अर्यालले रिट दायर गरेकोमा सर्वोच्च अदालतले त्यसलाई हालै खारेज गरिदिएको छ ।

यो प्रकरणमा राजनीतिक नेतृत्व मौन देखिएको भनेर आलोचना चुलिरहेका बेला कांग्रेसले यसलाई पनि उठाउने निर्णय लिएको हो ।