अमेरिकाले दक्ष विदेशी कामदारलाई दिने एच–वान बी भिसाको आवेदन शुल्क बढाएर एक लाख डलर पुर्‍याएको छ । अमेरिकी राष्ट्रपति डोनाल्ड ट्रम्पले भिसाको आवेदन शुल्क एक हजार डलरबाट बढाएर एक लाख डलर पुर्‍याउने आदेशमा हस्ताक्षर गर्नुभएको बीबीसीले जनाएको छ ।

एच–वानबी भिसालाई अमेरिकी प्रविधि कम्पनीहरूले विदेशबाट दक्ष कर्मचारी भर्ना गर्न उपयोग गर्छन् । अमेरिकाले एच–वानबी भिसाको शुरुआत सन् १९ सय ९० देखि गरेको हो । अमेरिकी सरकारको तथ्याङ्क अनुसार पछिल्लो आर्थिक वर्षमा यस भिसा प्रणालीको सबभन्दा धेरै उपयोग अमेजन, टाटा, मेटा, एपल तथा गुगलजस्ता प्रविधि कम्पनीहरूले गरेका थिए ।

सन् २०२५ को पहिलो ६ महिनामा अमेजन डट कम र उसको क्लाउड कम्प्युटिङ इकाइले १२ हजारभन्दा धेरै एच–वानबी भिसाको मन्जुरी लिएका थिए । यस्तै माइक्रोसफ्ट र मेटाले पाँच हजारभन्दा धेरै मञ्जुरी लिएका थिए ।

यो भिसा खासगरी स्टेम भनिने विज्ञान, प्रविधि, इन्जिनियरिङ तथा गणितजस्ता क्षेत्रका प्रतिभाशाली कर्मचारीका लागी हो । जसको विकल्प अमेरिकाभित्र अभाव छ । पछिल्लो तथ्याङ्क अनुसार यो भिसा पाउनेमा ७२ प्रतिशत भारतीय र १२ प्रतिशत चिनियाँ नागरिक छन् ।

यसैले भिसा शुल्क बढाउने अमेरिकी निर्णयले अमेरिका र भारतबीच चलिरहेको व्यापार वार्ता थप तनावपूर्ण हुन सक्ने बीबीसीले जनाएको छ । यस्तै ट्रम्पले अर्को कार्यकारी आदेश जारी गरेर नयाँ गोल्ड कार्डको स्थापना गर्नुभएको छ ।

जस अनुसार १० लाख डलर शुल्क तिरेपछि आप्रवासीहरूले भिसा द्रुत गतिमा पाउँछन् । ठूलो धनराशि तिरेर गोल्ड कार्डमार्फत अमेरिकामा बस्न र काम गर्न पाइने ट्रम्पले बताउनुभएको छ । यसलाई स्थायी बसोबासको अनुमति पत्र ग्रीन कार्डजस्तै भनिएको छ ।