काठमाडौँ, २९ मंसिर । नेकपा एमालेका अध्यक्ष केपी शर्मा ओलीले वैधानिक तरिकाले नै वर्तमान सत्ता गठबन्धन तोड्ने बताउनुभएको छ । ‘झुलाघाट–चिवा भञ्ज्याङ सम्मृद्धिका लागि सङ्कल्प यात्रा’अन्तर्गत शुक्रवार तेह्रथुमको म्याङ्लुङमा आयोजित कार्यक्रमलाई सम्बोधन गर्दै अध्यक्ष ओलीले धैर्यता राखेर वैधानिक ढङ्गले नै गठबन्धन तोड्ने बताउनुभएको हो । लोकतन्त्रमा धैर्यता राखेर लोकतान्त्रिक विधिबाटै समस्या समाधान खोज्नुपर्छ ।

अहिले हामी सरकारमा छैनौ, हामीलाई देशी विदेशी षडयन्त्रहरू लागेर सरकारबाट हटाइयो । हामीले सुशासन ल्याउने काम गर्‍यौ, त्यसकारण हामीलाई हटाइयो’, पूर्व प्रधानमन्त्री समेत रहेका ओलीले भन्नुभयो , ‘हामी फेरि पनि धैर्यतापूर्ण ढङ्गले अहिलेको गठबन्धन तोड्छौ ।’

उहाले यस गठबन्धनका अपराधहरूलाई देशको प्रगतिका बाधक बनेका क्रियाकलापलाई वैधानिक ढङ्गले जनताको अभिमतबाट परास्त गर्ने बताउनुभयो । ‘हतार गर्नु पनि हुँदैन । यो देश बनाउने कुरा हो । त्यही भएर हामीले मिसन २०८४ भनेका छौ’, ओलीले भने, ‘देश विकास गर्दै पुस्तौ पुस्ता अगाडि जाने हो । एउटा चुनाव हार्‍यो जित्यो, बुथ कब्जा गर्‍यो भनेर निर्क्योल हुँदैन ।’ उहाँले जे गरे पनि आन्दोलन हुने होइन भन्दै कालो झण्डा देखाउने वा अरू प्रकारका गतिविधि गर्नु, हिंसात्मक र मुठभेडले समस्या समाधान नगर्ने पनि बताउनुभयो । उहाँले नेकपा एमाले बलिदान, जेलनेल भोगेर आएको भन्दै यस पार्टीलाई जनताले अलमलमा नपरी साथ दिनुपर्ने बताउनुभयो ।

‘यो पार्टी मात्रै देशमा समृद्धि ल्याउन सक्छ, देश विकास गर्न सक्छ, जनताले विकासको बाटो देखाउन र सहयोगी भौतिक सामाजिक पूर्वाधार तयार गर्छ’, ओलीले नेकपा एमालेले कहिल्यै मौकापरस्त कुरा नगर्ने बताउनुभयो । अध्यक्ष ओलीले पहिचान पक्षधरप्रति सङ्केत गर्दै केहीले परिस्थितिलाई असहज र अप्ठेरो बनाउन खोजेको बताउनुभयो । ‘उनीहरुले अरूको विरोध गरे भन्ठानेका होलान् आफ्नै विकासको विरोध गरिरहेका छन् । आफ्नै ठाउको उन्नतिको विरोध गरिरहेका छन् । आफ्नै सन्ततिको भविष्य र आफ्नै टाउकोमा बन्चरोले हान्ने काम गरेका छन्’, ओलीले भन्नुभयो ‘यो भावनात्मक आवेग छोड्नुस्, उत्तेजना छोड्नुस् ।’ शान्तिपूर्ण र संवादबाट समस्याको समाधान खोज्न सकिने भन्दै बाटाका ढुंगामुढा र विरोध प्रदर्शनले, सल्लाका रुख ढालेर समस्या समाधान नहुने ओलीको भनाइ छ ।