काठमाडौं । जिल्ला अदालत कास्कीले राष्ट्रिय स्वतन्त्र पार्टीका सभापति रवि लामिछानेलाई अझै १३ दिन हिरासतमा राख्न अनुमति दिएको छ ।

आज लामिछाने रिहा हुनसक्ने धेरैको अनुमानविपरित थप १३ दिन हिरासतमा राख्न अनुमति दिइएको हो । जिल्ला न्यायाधीश नवराज दाहालको इजलासले जिल्ला प्रहरी कार्यालय कास्कीलाई रवि लामिछानेलाई थप १३ दिन हिरासतमा राख्न अनुमति दिएको हो ।
सहकारी ठगी प्रकरणमा अनुसन्धानका लागि गत कात्तिक २ मा पक्राउ परेका लामिछानेमाथि प्रहरीले सहकारी ठगीसँगै संगठित अपराध र सम्पत्ति शुद्धीकरण मुद्दामा पनि अनुसन्धान गरिरहेको छ ।

कात्तिक २ गते राति पोखरा लगिए पनि शनिबार परेकाले ४ गतेमात्रै अदालत उपस्थित गराइएको थियो । त्यतिबेला अदालतले पहिलो पटकका लागि पक्राउ परेको दिनदेखि गणना हुने गरी ७ दिन म्याद थप भएको थियो । त्यसपछि दोस्रो पटक ६ दिन म्याद थप गरिएको थियो भने तेस्रो पटक १० दिन म्याद थपिएको थियो ।

रास्वपाका नेता कार्यकर्ताहरुले भने लामिछाने र आफूहरुको पार्टीको लोकप्रियतादेखि डराएर ठूला दलहरुले षडयन्त्रमूलक र प्रतिशोधमूलक ढंगले लामिछानेलाई पक्राउ गरी दुःख दिएको भन्दै विना शर्त रिहा गर्नुपर्ने बताउँदै आएका छन् ।