प्यालेस्टिनी विद्रोही समूह हमासले अमेरिकी युद्धविराम प्रस्तावमाथि तत्काल वार्ता गर्न तयार रहेको जनाएको छ । हमासले गाजा युद्धविराम र बन्धकहरूको रिहाइसम्बन्धी नयाँ अमेरिकी प्रस्तावलाई सकारात्मक प्रतिक्रिया दिएको बताएको बीबीसीले जनाएको छ ।

हमासले विज्ञप्ति जारी गर्दै तत्काल वार्ताका लागि तयार रहेको बताएको छ । वार्तासँग परिचित एक प्यालेस्टिनी अधिकारीले हमासले प्रस्तावको रूपरेखा स्वीकार गरेको बताएका छन् ।

यद्यपि हमासले अमेरिकी प्रस्तावमा संशोधनको माग गरेको छ । यसबारेमा अमेरिका र इजरायलबाट अहिलेसम्म कुनै प्रतिक्रिया आएको छैन ।

अमेरिकी राष्ट्रपति डोनाल्ड ट्रम्पले हिजो गाजामा अर्को हप्तासम्म युद्धविराम सम्झौता हुन सक्ने बताउनुभएको थियो । ट्रम्पले गएको मङ्गलवार इजरायलले ६० दिनको युद्धविरामका लागि शर्तहरू स्वीकार गरेको बताउनुभएको थियो ।

ट्रम्पले हमासलाई यो प्रस्ताव स्वीकार गर्न आग्रह गर्नुभएको थियो । यदि हमासले यो प्रस्ताव अस्वीकार गरे स्थिति बिग्रन सक्ने उहाँले चेतावनी दिनुभएको थियो ।

युद्धविराम प्रस्तावमा हमासले १० जीवित इजरायली बन्धकको क्रमिक रिहाइ र इजरायली जेलमा रहेका प्यालेस्टिनी कैदीहरूको बदलामा १८ अन्य बन्धकको शव समावेश गर्ने खबरमा उल्लेख छ । यस्तै संयुक्त राष्ट्रसङ्घ र रेडक्रसको अन्तर्राष्ट्रिय समितिको संलग्नतामा गाजामा पर्याप्त मात्रामा मानवीय सहायता उपलब्ध गराउने कुरा पनि प्रस्तावमा छ ।