काठमाडौं । पोखराको सूर्यदर्शन सहकारी ठगी प्रकरणमा पार्टी सभापति रवि लामिछानेलाई ६५ लाख धरौटीमा छाड्न अदालतको आदेश आउँदा राष्ट्रिय स्वतन्त्र पार्टी (रास्वपा) नेता–कार्यकर्ता र समर्थकले खुशीयाली बाँड्न थालेका छन् ।

जिल्ला अदालत कास्कीले बिहीबार दिएको थुनछेक आदेशअनुसार रविलाई ६५ लाख धरौटी मागिएको छ । त्यसपछि रास्वपाका कार्यवाहक महामन्त्री कवीन्द्र बुर्लाकोटीले लेखेका छन्, ‘पार्टी सभापति रवि लामिछाने ज्यूलाई जिल्ला अदालत कास्कीले ६५ लाख धरौटीमा छाड्न आदेश गरेको छ । सरकारले जबरजस्ती हिरासतमा राखेर अनुसन्धान गर्नुपर्ने औचित्य नरहेको पुष्टि भएको छ ।’

रास्वपा सांसद सोविता गौतमले रवि सहित कुनै अभियानको तस्वीर हाल्दै क्याप्सनमा ‘अटल, अडिग, अविचलित’ भनेर लेखेकी छन् । उता कास्की जिल्ला अदालतबाहिर रास्वपाका नेता कार्यकर्ता नाराबाजीमा उत्रिएका छन् । अदालतल धरौटीमा रिहा गर्न आदेश दिएपछि बाहिर भेला भएका समर्थकहरू रविको पक्षमा नाराबाजी गरिरहेका छन् । पोखराका सडकमा सुरक्षाकर्मीको बाक्लो तैनाथी छ । अदालत क्षेत्रमा आवागमनमा कडाइ गरिएको छ ।